Aktuells 

Die neuste Föteli, Abentüür und Erfolg teile mr do witer unde, uf Facebook und uf Instagram mit euch ..... #instachönnemr

Turnfest Zuzwil 24.-25.06.2023

Zäme mit em Turnverein si mr das Johr ans Toggenburger Turnfest in Zuzwil greist. Sit langem si mr wiedr mol als Mixedteam an Start.
Zerscht hän mr eus in de Diszipline Speer und Kugelestosse dörfe mässe. Denn isch Steistosse und Wurf dra gsi. Die letzti Disziplin isch dr Fachtest Allround gsi. Mit ere Note 24,59 si mr ganz zfriede, gsehn aber au no Steigerigspotenzial.
Am Obe sin mr in dr Festmeile unterwägs gsi und hän uns e paar Bier gönnt.
Dr Sunntig isch ganz im Zeiche vom gmüetliche Zämesii gstande. Bi bestem Wätter hän mr d'Stimmig no einisch hochläbe loh bevor mr d'Heireis in Agriff gnoh hei.

UBS Kids Cup 21.06.2023

Mir hei eus gfreut si so vill Kinder uf Thürne cho und hän die letschti Chance gnutzt, sich für d Kantonalfinals z'qualifiziere. Mir hän alli Händ voll z'tue gha und hän vieli glücklichi aber au enttüschti Kinder erläbt.

KJTF 11.06.2023

Eusi Jugendriege und KiTu si am Kantonale Jugendturnfescht in Gälterkinde im Isatz gsi. Mir gratuliere em KiTu zu ihrem 2. Rang!

3 Spiele Turnier 13.05.2023

In Zeglinge si mr zäme mit em TV am 3 Spielturnier aträtte und in 5 Kategorie gstartet. D'Männer 35+ und Mixed 35+ hän sogar dr Finalizug gschafft. Au die restliche Teams hän gueti Spiel zeigt, aber zum ganz vorne mitspiele hets nid glängt.
Dr Obe hän mr gmeinsam lo usklinge und mit feinem Ässe und musikalischer Unterhaltig vom Hausi:-)

Eierläset 16.04.2023 

Au das Johr isch s Wätter leider nid so super xi, abr trotzdem si e huffe Lüt cho luege und de Chinder hets Spass gmacht. Es isch e spannende Wettkampf xi wo s Team Grüen für sich entschiede het.
In dr Halle sin denn alli Eier brötlet und gässe worde, s Chuechebuffet isch leer grumt worde, d Kinder hän e riese Spass uf de Mattene gha und die Erwachsne hän gmüetlich chöne zäme si.
Danke an d Dorfbevölkerig für die ville Spände und allne Hälferinne und Hälfer fürs Mitwirke.

Advents-Buurezmorge 11.12.22 

Öbbe 170 Lüt hän mr am traditionelle Buurezmorge dörfe mit feine Sache versorge. Es het e huffe Arbet geh, abr es het au vill Spass gmacht und au Kinder vom Muki-Turne sin stolz xi über ihre erschti Uftritt.

Altjohreshock vom 03.12.22 

Troffe hän mr eus natürlich zentral in Thürne. D' Organisatorinne Vicky und Sandra hän uns denn abr gli wiedr elei loh und mir hän sälber müesse use finde wos ahne goht. So sin mr uf Sissach spatziert, hän unterwegs müesse e Rätsel löse und so hän mr den mit em richtige Lösigswort au dr Wäg in d'Exotic Sissach gfunde. Mit me feine Ässe, Lotto-Mätch und dr Gschänklirundi hän mr so dörfe e kurzwilige, güetliche Obe verbringe.

Advents-Buurezmorge am 11.12.22 

Bald isch es sowit und euses feine Buurezmorge im Advent findet wieder statt. Chömet verbii, es git vieli feini Sache. Und euse jüngschti Nochwuchs, d' Kinder vom Muki-Turne, hän au no ganz e churze, härzige Uftritt.

Vereinsreis 10.-11.09.2022 

Eusi DTV-Reis het eus das Johr uf Zermatt gfüehrt. Am Samschtig kurz vor de 6i am Morge hei sich 7 Fraue uf d Reis gmacht. D Wanderig vom Samschtig isch dr 5 Seeäwäg gsi, wo s Matterhorn immer wieder im Zentrum gstande isch. Am Sunntig isch d Gornerschlucht bestunt worde. Miteme feine Zmittag wiedr mit Blick uf s Matterhorn hei mr die Vereinsreis lo usklinge. Bi schönem Wätter und gueter Stimmig isch d Reis z End gange.

Schnupperstund 14.09.2022 

Mir freue uns sehr, wenn es paar in eusi Schnupperstund chöme und freud hän mitenand zturne. Es si ganz abwächsligsriichi Stunde und macht vill meh Spass als elei ztrainiere:-)

Thürner Turntage 02./03.09.2022 

Sit mehrere Täg isch dr TV am Ufbaue für d Thürner Turntäg. Am Fritig und Samschtig si denn au es paar vo eus im Isatz, z.b. am Steisstosswettkampf oder au als Hälfer.

Turnfest Wiesendangen 18. - 19.06.2022

Bezirksturntag 04.06.2022 

Am Pfingstsamschtig si mr zu 9. am Bezirksturntag gstartet und hän e tolle Tag bi super Wätter verbrocht. Für alli isch es scho lang här gsi sit em letschte Wettkampf und für e Teil isch es sogar s aller erschti mol gsi. Mir hän uns so au chöne fürs Turnfescht in Wiesendangen vorbereite und hän dr 9. Platz gmacht.